«Prague Masters». Nodirbek Abdusattorov qo‘pol xato tufayli yutqazdi

Chexiya poytaxti Praga shahrida shaxmat bo‘yicha "Prague Masters" xalqaro musobaqasida bugun 6-tur o‘yinlari bo‘lib o‘tdi. Hamyurtimiz Nodirbek Abdusattorov bu turda hindistonlik Rameshbabu Pragnanandhaga qarshi oq donalarda o‘ynadi. Hamyurtimiz debyutdan kichik ustunlik bilan chiqdi. Boz ustiga, raqib kichik noaniqliklarga yo‘l qo‘ya boshladi. Biroq Abdusattorov o‘sha pallada eng aniq yurishlarni topa olmadi. U boshqa reja bo‘yicha ketdi. Natijada vaziyat tenglashib qoldi. Rameshbabu durangga rozidek harakat qilayotgandi, ammo Nodirbek 36-yurishda o‘ta qo‘pol xatoga yo‘l qo‘ydi. Buning oqibatida vatandoshimiz bir sipohi — Fildan ayrildi va ustunlik Pragnanadha tomoniga o‘tib ketdi. Pragnanandha esa ustunlikni qo‘ldan chiqarmadi va bahsni g‘alabagacha olib bordi. Nodirbek Abdusattorov mag‘lubiyatga qaramay, jadvalda yaqqol peshqadamligicha qoldi. Uning hisobida 4,0 ochko mavjud bo‘lsa, Richard Rapport, Praham Maqsudlu va Rameshbabu Pragnanandha hisobida 3,5 tadan ochko mavjud. Vatandoshimiz 5 mart, seshanba kuni germaniyalik Vinsent Keymerga qarshi qora donalarda o‘ynaydi.










Manba: www.aniq.uz “Andijonliklar.Uz” yangiliklarini “Telegram”da kuzatib boring